Trajediya sedsalan ‘Hoy Memo’: Murad Demîr ji nû ve şîrove kir
Hunermend Murad Demîr, strana gelêrî ya navdar "Hoy Memo" ku bi çîroka xwe ya trajîk di hafizeya çandî ya herêmê de xwedî cihekî kûr e, bi şîrove û binesaziyeke nûjen ji nû ve pêşkêşî guhdaran kir.
Amîda Kurdî - Hunermendê Kurd Murad Demîr, strana gelêrî ya navdar "Hoy Memo" ku di çanda herêmî de xwedî fîgureke trajîk e, bi şêwazekî nûjen ji nû ve şîrove kir. Berhem ji ber çîroka xwe ya li ser bingeha poşmanî û şaşfêmkirineke malbatî, di nav xebatên muzîka kurdî ya hemdem de balê dikişîne.
Trajediya sedsalan ‘Hoy Memo’: Murad Demîr ji nû ve şîrove kir ????https://t.co/FEeNqbMrcOpic.twitter.com/1vDzTp5QxE
— Amîda Kurdî (@AmidaKurdi) August 12, 2026
Çîroka sedsalan: Ji rêwîtiyekê ber bi trajediyekê ve
Li gorî çavkaniyên çanda gelêrî ya herêma Amedê, naveroka berhemê li ser bûyereke rastî ya trajîk hatiye avakirin. Xortê bi navê Memo, ji bo dabînkirina pêdiviyên malbatê bi hespê xwe qesta navenda bajarê Amedê dike. Memo rêwîtiya ku bi gelemperî çend rojan dikişîne di demeke kurt de temam dike û di nîvê şevê de vedigere malê. Ji bo ku îstîraheta malbatê xira neke, bêyî ku xeberî bide kesî, derbasî odeya xwe dibe.
Lê belê, dayika wî di tariya şevê de dengên di odeyê de dibîze. Bi gumanê ku kesekî biyanî ketiye hundir û xiyanet li kurê wê hatiye kirin, bi tifengê diçe odeyê û Memo dide guleyan. Ev şaşfêmkirin dibe sedema mirina Memo. Û dayika wî li ser vê bûyerê dest davêje gotinan û dibêje, "Day kore bû neniyasî"
Şîroveya nûjen û parastina hafizeya çandî
Ev bûyera ku di nava civakê de şîneke mezin ava kiriye, bi hevoka "Day kor bû neniyasî" di nava lîteratûra muzîka kurdî de wekî şîn cih girtiye.
Hunermend Murad Demîr, bi vê xebata xwe ya nû, bi şîroveyên xwe yên li ser stranê eşkere dike ku cîhanbîniya klasîk a berhemê diparêze û bi binesaziyeke nûjen pêşkêşî guhdaran dike. Murad wiha dibêje: Silav guhdarên hêja, hêvî dikim hun baş bin. Hinek heval qala strana Memo dikin û dibêjin ev ne orjinal e. Gelek stranên gelerî li gelek deveran bi selîqeyên cuda tên xwendin. Hemû jî "orjînal” in û rast in. Wek nimûne, selîqeya strana Nîmokê heman demê wekî selîqeyeka Şekir Axa jî tê xwendin yan jî li aliyê Botan strana Hoy Nerme wek selîqeya Xelef tê xwendin. Herwiha seydiko li Badînan cuda li Botan cuda tê xwendin. Ma em dikarin bêjin Şukrî Rêkanî yan jî Fadil Cizîrî şaş xwendî ye? Strana Memo jî li Badînan bi teybetî jî li Çelê bi vê selîqê tê xwendin û min jî wek bav û kalên xwe xwend û belav kir.
Gelek hezkiriyên wî jî destnîşan kirin ku ev hewldan, bo hafizeya çandî û bûyerên dîrokî yên herêmî ku ber bi nifşên paşerojê ve tîne xwedî ciheke mezin e
Şîrove Bike
- 6 ay önce
Şîrove