Meclîsa Jinan a Partiya DEMê: Ev derman ji aliyê kê ve û kengî ji bo Rojînê hatine bikaranîn?
Meclîsa Jinan a Partiya DEMê diyar kir ku kuştinên jinan ji aliyê saziyên dewletê ve tên veşartin û doza Rojîn Kabaişê mînaka vê yekê ye.
Amîda Kurdî - Daxuyaniya nivîskî ya Meclîsa Jinan a Partiya DEMê derbarê lêkolîna li ser mirina Rojîn Kabaişê de daxuyaniyek da.
Daxuyanî wiha ye:
Doza kuştina Rojîn Kabaişê mînakeke berbiçav e ku nîşan dide ka çawa kuştinên jinan rasterast ji aliyê saziyên dewletê ve tên veşartin. Ew rastiya ku waliyê bajêr bûyer wekî "xwekujî" bi nav kir, bêyî ku otopsiyek jî were kirin, delîlek e ji bo vê yekê.
Bêdengiya wezîrên hikûmetê li hemberî derketina agahiyên nû yên derbarê kuştina Rojîn Kabaişê de, nîşaneya wê yekê ye ku çawa rê li ber lêkolînê tê girtin.
Di raporên ku li dosyeya dozê hatine zêdekirin de, her roj agahiyên nû derdikevin holê. Herî dawî, di rapora otopsiyê hatibû amadekirin de, hat diyarkirin ku derman (Rocuronium û Ornidazole) di zik û organên Rojînê de hatine dîtin.
Divê Wezareta Tenduristiyê û Wezareta Dadê bersiva van pirsan bidin:
Ew dermanên ku di zik û organên Rojînê de hatine dîtin, ji ku derê hatine?
Ev derman ji aliyê kê ve û kengî ji bo Rojînê hatine bikaranîn?
Gelo tomarên wê nexweşxaneyê ku emeliyat lê hatiye kirin, hatine kontrolkirin?
Gelo bi bijîşk û xebatkarên tenduristiyê yên têkildar re hevdîtin hatiye kirin?
Çima ev encam ev du sal in nebûne mijara lêkolîneke berfireh?
Dîtina bersiva van pirsan dê her wiha bibe nîşaneya gaveke rastîn a têkoşîna li dijî kuştina jinan û tundiya li ser jinan li vî welatî.
Çareserkirina doza kuştina Rojîn Kabaişê deynê vê hikûmetê ye li hemberî jinan.
Şîrove Bike
- 6 ay önce
Şîrove