Li Kobaniyê piştî kuştina Sîpan Huznî alozî derket: Mirî û birîndar hene
Li bajarê Kobaniyê yê Rojavayê piştî kuştina şervanê bi navê Sîpan Huznî alozî derket û li zindana bajêr şewat çêbû. Di şewatê de 3 kesan canê xwe ji dest da û bi dehan girtî jî birîndar bûn.
Amîda Kurdî - Piştî kuştina Sîpan Huznî li bajêr alozî derket û derdora saet 02:00an li zindana Kobaniyê şewatek derketiye. Ji ber şewat û dûxana zêde gelek girtî birîndar bûne û ew birine nexweşxaneyên bajêr.
Heta niha sedema derketina vî agirî bi zelalî nehatiye zanîn û lêkolîna aliyên pêwendîdar li ser bûyerê didome.
Bijîşkê Nexweşxaneya Almanî ya li Kobaniyê Dr. Mizgîn Murşîd li ser rewşa birîndar û qurbaniyan daxuyanî da û anî zimên ku rûdanên li Kobaniyê gelekî mezin in.
Dr. Mizgîn Murşîd eşkere kir ku di zindanê de 26 girtî şewitîne û got:
"3 kes ji wan girtiyên şewitî mirin.
Rewşa tenduristiyê ya ji sedî 60î ya girtiyên şewitî baş e û dermankirina wan berdewam dike lê rewşa birîndarekî ne aram e."
Li aliyê din, berpirsên ewlehiyê ragihand ku aliyên pêwendîdar li ser tawanê dest bi lêkolîneke hûr kiriye û beşek ji gumanbarên kuştina Sîpan Huznî hatine desteserkirin.
Hat destnîşankirin ku şopandina ewlehî û îstixbaratê berdewam dike heta ku hemû tohmetbar bên girtin û radestî dadgehê bên kirin.
Şîrove Bike
- 6 ay önce
Şîrove