Li Berlînê yekem dibistana Kurdî-Almanî tê vekirin
Li Berlînê, li paytexta Almanyayê, amadekariyên vekirina Dibistana Seretayî ya Riza Baran tên kirin. Dibistaneke ku tê de hem Kurdî û hem jî Almanî dê wekî zimanên perwerdeyê bên bikaranîn. Armanca dibistanê bo qonaxa destpêkê 24 xwendekar in.
Amîda Kurdî - Dibistana Seretayî ya Riza Baran dê bibe yekem dibistana seretayî li Ewropayê ku hem Kurdî û hem jî Almanî wekî zimanên perwerdeyê bi kar tîne. Dersên wekî matematîk, zanistên civakî, muzîk, huner û perwerdehiya bedenî dê hem bi Kurdî û hem jî bi Almanî bên dayîn.
Ev proje, ku bi pêşengiya YEKMALê (Yekitiya Malbatên ji Kurdistanê li Almanyayê) tê birêvebirin, plan dike ku di pêngava yekem de 24 xwendekaran werbigire. Dibistan, ku dê polên yekem heta şeşemîn li xwe bigire, niha li benda erêkirina fermî ya Senatoya Berlînê ye.
Di daxuyaniyeke ji bo Nûmedya24ê de, Rêvebirê Giştî yê YEKMALê Gunay Darici diyar kir ku ev dibistan ne tenê saziyeke perwerdeyê ye, lê di heman demê de gaveke girîng e ji bo naskirina ziman û civaka Kurdî.
Armanca YEKMALê ew e ku di sala yekem a dibistanê de 24 xwendekaran perwerde bike û plan dike ku di salên pêş de hejmara xwendekaran zêde bike. Dibistan dê ji bo hemû zarokan vekirî be, tevî wan zarokên ku bi Kurdî nizanin jî.
Şîrove Bike
- 7 ay önce
Şîrove