Kurtulmuş: Ev pêvajo projeya herî mezin a sedsala duyemîn e
Serokê Parlamentoyê Numan Kurtulmuş derbarê pêvajoya çareseriyê de got: "Ev dê bibe projeya herî girîng a sedsala duyemîn û bi îzna Xwedê, em ê bi ser bikevin."
Amîda Kurdî - Serokê Parlamentoyê Numan Kurtulmuş beşdarî merasîma vekirina sala xwendinê ya 2026-2027an a li Zanîngeha İnonu ya li Meletiyê bû. Kurtulmuş di axaftina xwe ya derbarê vê destpêşxeriya nû de wiha got: "Ev pêvajo, ku me ji bo çareserkirina pirsgirêka herî krîtîk a sedsala yekem a dîroka Komara xwe daye destpêkirin, berpirsiyariyeke nû dide ser milên me. Ez ji dil pîrozbahiyê li her kesê ku heta niha di vê projeya mezin de ked daye, dikim."
'Bi awayekî vekirî û şefaf tê meşandin'
Kurtulmuş bal kişand ser wê yekê ku ev pêvajo bi awayekî vekirî û şefaf tê birêvebirin û bibîr xist ku hewldanên berê yên ji bo çareserkirina vê pirsgirêkê —di serdemên Turgut Özal, Necmettin Erbakan, Süleyman Demirel û Bülent Ecevit de— encam nedane. Kurtulmuş diyar kir ku yek ji bingehên sereke yên pêvajoya heyî, hevgirtina "aqilmendiya dewletê" û "wijdana neteweyê" ye; her wiha anî ziman ku di civîneke komîsyona parlamentoyê de, gaziyekî leşkerî bi vegotina serpêhatiyên xwe yên şexsî piştgiriya xwe ji bo vê destpêşxeriyê nîşan daye.
Kurtulmuş bal kişand ser wê yekê ku divê ev pêvajo ne tenê wekî hewldaneke ji bo derxistina yasayan an jî mijareke di rojeva partiyên siyasî de were dîtin û got: "Ev mijareke gelekî girîng e ku ne tenê paşeroja Tirkiyeyê, lê paşeroja tevahiya herêmê jî eleqedar dike. Ev di dîroka Komara me de mijara herî dijwar bûye. Her wiha, ev ê bibe projeya herî girîng a sedsala duyem a Komarê; bi îzna Xwedê, em ê bi ser bikevin."
Şîrove Bike
- 7 ay önce
Şîrove