Fuara Pirtûkan a Hewlêrê dest pê dike: Avesta û Nûbihar jî beşdar dibin

Dîroka Weşanê: 3 gün önce

Fuara Pirtûkan a Hewlêrê dest pê dike: Avesta û Nûbihar jî beşdar dibin

Fuara Navneteweyî ya Pirtûkan a Hewlêrê sibê dest pê dike û du weşanxaneyên mezin, Avesta û Nûbihar jî dê li fuarê bin.

Amîda Kurdî - Fuara Navneteweyî ya Pirtûkan a Hewlêrê bi 400 dezgehên çap û weşanê dê gera xwe ya 18an bigerîne û fuar dê bi beşdariya Serokê PDKê Mesûd Barzanî destpê bike.

Pêşangeh bi dirûşma "Ez Kurdistanî me" tê lidarxistin û dê heta 31ê vê mehê bidome.

Ev dezgehên weşanê ji 18 welatan tên. Ew dê bi zêdetirî milyonek pirtûkên di warên cuda de serdankeran pêşwazî bikin.

Du weşanxane jî ji Bakur tevlî dibin. Weşanên Avesta û Weşanên Nûbiharê dê sibê standên xwe vekin.

Weşanên Avestayê, yek ji weşanxaneyên kurdî yên herî girîng, navdar û demdirêj e. Di sala 1995'an de li Stenbolê ji aliyê Abdullah Keskin ve hatiye avakirin û zêdetirî çaryek sedsal e bê navber xebatên xwe didomîne. Berhemên xwe bi giranî bi her sê zaravayên kurdî (kurmancî, soranî, zazakî) û her wiha bi zimanê tirkî diweşîne. Di nav de berhemên edebî (roman, çîrok, helbest), lêkolînên dîrokî û sosyolojîk, xebatên li ser folklora kurdî û bîranîn hene. Wan heta niha gelek klasîkên edebiyata cîhanê wergerandine kurdî û berhemên kurdî yên kevn û windabûyî jî ji nû ve gihandine ber destê xwîneran. Avesta di geşedan, parastin û dewlemendkirina ziman û edebiyata kurdî de xwedî cihekî dîrokî ye.

Weşanên Nûbiharê di dîroka weşangeriya kurdî de xwedî cihekî pir taybet û girîng e. Xebatên Nûbiharê di sala 1992'yan de bi derxistina Kovara Nûbiharê dest pê kir. Ev kovar, di dîroka Tirkiyeyê de kovara kurdî ya herî demdirêj e ku heta niha bê navber weşana xwe didomîne. Nûbiharê bi giranî cih daye edebiyata klasîk a kurdî (berhemên Ehmedê Xanî, Melayê Cizîrî, Feqiyê Teyran), lêkolînên dîrokî, berhemên olî/îslamî û xebatên akademîk. Her wiha roman, çîrok û helbestên nûjen jî diweşînin. Yek ji xizmetên wan ên herî mezin, çapkirina ferhengên berfireh (bi taybetî yên kurdî-tirkî û tirkî-kurdî) û pirtûkên rêzimanê ye. Di gihandina çanda medreseyan û mîrateya klasîk a kurdî bo nifşên nû de rola Nûbiharê wekî pirekê ye. Nûbiharê mîrateyeke devkî û destnivîsî ya sedsalan derbasî ser kaxizê kiriye û parastiye.