Amed de doktorî ciwanêk derb kerd: Zincîya ey şikîya
Amed de îddîa bi ke hekîmêk bi nameyê İ.H. û birayê ey, seba meseleya dora ATM, ciwanêko 17 serre derb kerdî û zincîya (pirnika) ey şikit.
AMÎDA KURDÎ - Amed de îddîa bi ke E.Ö.yo 17 serre, hetê hekîm İ.H. û birayê ey ra ameyo derbkerdene û zincîya (pirnika) ey şikîyaya. Keyeyê ciwanî vera doktor û birayê ey gerre kerd.
Hedîse, roja Yewşemeyî saete 16.08 de, hewşê Nêweşxaneyê Nêweşîyanê Cinîyan û Gedeyan ê Amedî de, verê ATMya Banqaya Zîraetî de qewimîya.
Goreyê îddîaya keyeyî, E.Ö.yo 17 serre seba ke pere bianco şîyo ATM ya ke nezdîyê keyeyê xo. Nê wextî de mabênê E.Ö. û hekîm İ.H. de seba dora ATM munaqeşeyo fekkî virazîyayo.
Goreyê îddîayan, dima ke E.Ö.yî pereyê xo ant, cayê hedîseyî ra dûrî kewt. Labelê wextê ra dima, İ.H. û birayê ey H.B.yî hêrişê ey kerd. E.Ö.yo ke netîceyê derbkerdişî de birîndar bi, hetê merdimanê dormeyî ra wedarîya servîsê lezgînî yê nêweşxaneyî. Uca de mudaxaleyê verên ame kerdene û dima ra hetê keyeyê xo ra wedarîya Nêweşxaneyê Dewlete yê Selaheddîn Eyyûbî.
Zincîya (pirnika) ey şikîya
Tetkîkanê ke servîsê lezgînî de ameyî kerdene de, ame tesbîtkerdene ke zincîya (pirnika) E.Ö.yî şikîyaya, çimê ci sûr bîyo.
Keyeyo ke raporê derbkerdişî girewt, muracatê Mudurîya Şube ya Domanan a Mudurîya Emnîyetê Qezaya Yenîşehîrî kerd û vera İ.H. û H.B.yî de gerre kerd. Hekîm İ.H. û birayê ey H.B., dima îfadeyanê xo yê emnîyetî, ameyî veradayîş.
Şîrove Bike
- 6 ay önce
Şîrove