Amed de aşmêke de 3 xebatkarê weşîye xo kiştê
Amed de, zêdebîyayîşê intîharan û teşebusê intîharî yê mîyanê xebatkaranê weşîye, şertanê xebate yê giranan ê xebatkaranê weşîye newe ra ard rojdem.
AMÎDA KURDÎ -Amed de mîyanê xebatkar û hekîmanê weşîye de weqayê intîharî û xebitnayîşê dermananê psîkîyatrîkî roj bi roje zêde beno. Aşma vîyarteyî de, Asîstanê Cerahîya Pêroyî Ahmet Coşkun o ke Nêweşxaneyê Cigêrayîş û Perwerdeyî de wezîfe kerdêne û asîstana pispore Ozge Salmane ya ke Nêweşxaneyê Didanî yê Zanîngeha Dîcle de bîye, keyeyanê xo de merde ameyî vînayîş.
Tewr peynî de, Teknîsyenê Tibê Lezgînî Veysel Tekîn o ke Nêweşxaneyê Dewlete yê Farqînî de wezîfe kerdêne, wextê nobetî de bi raya serûmî dozêko berz derman girewt û xo kişt.
Serekê Odeya Tabîban a Amedî Veysî Ulgenî Amîda Haberî rê qisey kerd û sebebanê peyê intîharan şîrove kerd. Ulgenî va ke intîharê ke zêde bîyê, tena bi nêweşîyanê ruhîyan ê ferdîyan nêno îzahkerdene û wina va:
“Wextanê peyênan de mîyanê hekîm û xebatkaranê weşîye de weqayê intîharî bi awayêko cîddî zêde bîyê. Ma ney tena sey meseleyêka psîkolojîke nêvînenê. No bi temamî problemêko sosyolojîk û cimatkî yo. Hekîm û xebatkarê weşîye cayanê ke tede xebitîyenê de bextewar nîyê.”
Şîrove Bike
- 6 ay önce
Şîrove