Amed de ame waştiş ke wa ziwanê Kurdkî bibo ziwanê perwerdeyî
Sazgehanê ziwanê kurdkî bi wesîleya 21’ê Sibate Roja Ziwanê Dayîke ya Dinya deklarasyonê xo yê hempar eşkera kerd.
Kaynak: Bülten
AMÎDA KURDÎ - Eşkerayîye de amey vatiş ke, însanî bi ziwanê xo benê însan û komelî zî bi ziwanê xo benê netewe. Ame vatiş ke seba pîyaciwîyayîşê şaran û demokrasî, seypêyîya ziwanê dayîke şertêko bingeyin o.
Programê çalakîyan
Sazgehanê ziwanî eşkera kerd ke ê do mîyanê aşma sibate de bi nê aktîvîteyan bîyarê ca:
- Panel û semînerî serê hişmendîya ziwanî.
- Kayê tîyatroyî seba cinî û gedeyan.
- Şewa Dengbêjan û konserê zafziwanî.
- Standê îmzakerdişê kitaban û nîşandayîşê fîlman.
- Rayîrşîyayîş û eşkerayîyê çapemenîye.
”Sazgeha UNESCO û Wezîrê Perwerdeyî rê Mektûb”
Meclîsê Kirmanckî zî da zanayene ke ê do seba vernîgirewtişê helîyayîşê kirmanckî, Sazgeha UNESCO û Wezîrê Perwerdeyî rê mektûban bişirawê.
Waştişê Bingeyinî
Sazgehanê ziwanê kurdkî bi nê waştişan bang kirin:
- Ziwanê kurdkî qanûnê bingeyinî (anayasaya) de bêro qebulkerdene.
- Kurdî bibo ziwano fermî.
- Verdibistane ra heta unîversîte perwerdeyo bi kurdkî bêro destpêkerdene.
Eşkerayîye bi nê çîyî ameyî vatiş:
SEBA ŞARÊ MA, ÇAPEMENÎ Û RAYA PÊROYÎ DEKLARASYONÊ MA YÊ 21Ê SIBATE ROJA ZIWANÊ DAYÎKE YA DINYA
Şarê Ma YO Birûmet, Kedkarê Çapemenîye!
Ziwan, seba merdiman, şaran û neteweyan Rûmet o, Nasname yo, Estbîyayîş o. Eynî wext de esaso bingeyin ê netewbîyayîşî yo. Însanî bi ziwanê xo benê însan, şar û komelî bi ziwanê xo benê netewe.
Sewbîna şar û komelî bi rûmetê erj û rûmetê yewbînan, eşkenê mabênê xo de heskerdiş û hîsanê wayûbiratîye awan bikerê, aver berê û bingeyê hemsengî û pîyaciwîyayîşî bikerê daîmî û domdar; seypêyîya ziwanê dayîke zî, bi zafrengî, zafvengî, zafkulturî û zafziwanîye saz bikerê.
Ma ewro seba bernameyê 21’ê sibate Roja Ziwanê Dayîke ya Dinya ameyî pêser.
Bêguman tarîx û hîkayeya na roje est a ke seba ziwananê şar û komelan hende muhîm a.
Têkoşînê şarê Bengalî (şarê welatê Bangladeşî yê ê wextî) yê seba ziwanê xo yê dayîke ke têkoşîn û kampanyaya çalakîyanê wendekaranê unîversîteya Dakka, şiknayîşê sîstemê yewperestî û yewziwanî de bîyî bingeyê na roja pawitişê kultur û ziwananê ke hemverê talûkayê çinbîyayîşî de yê.
Coka 21’ê sibate hetê Sazgeha Kultur, Ziwan û Zanistî (UNESCO) ra sey Roja Ziwanê Dayîke ya Dinya ameya qebulkerdiş û îlankerdiş.
Seserra 21. de hîna zî zaf welatanê dinya de şar û neteweyî, sey şarê kurdî seba kultur, ziwan û nasnameyê xo têkoşîn kenê, dewaya heqanê xo yê kolektîfan kenê û seba erj û rûmetê xo yê neteweyî bedelanê girsan danê.
Şarê kurdî zî, se serran ra zêdeyêr o ke hemverê sîstemê yewperestî de xover dano ke hemverê kultur, ziwan û nasnameyê şarê kurdî de sîyasetê înkar û çinkerdişî ramneno. Dewaya heqanê xo yê nasnameyî keno û veng dano heme şaranê Kurdîstanî, Tirkîya û dinya rê ke têkoşînê xo yê seba statu û heqanê xo yê ziwanî hêzdarêr bikerê.
Sey sazgehanê ziwanê kurdî, bi hîs, tepş û hişmendîya pawitiş, averberdiş û berzkerdişê qîmet û rûmetê ziwanê kurdî, bi waştişanê xo yê Perwerdeyo bi Ziwanê Dayîke, ma do bi şîarê “STATUYÊ KURDKÎ — PERWERDEYO BI KURDKΔ xebatanê xo yê Ziwanê Kurdî ke çarçeweya 21ê sibate Roja Ziwanê Dayîke ya Dinya de yê, bikerê û bi panel, rayîrşîyayîş, eşkerayîye, nîşandayîşê kayanê tîyatro, fîlm û belgefîlman, nîşandayîşê kayanê tîyatro yê seba cinîyan û sewbîna kayanê tîyatro yê seba gedeyan, şewa dengbêjan, bernameyê îmzakerdişê kitabanê ke hetê nuştoxanê kurdan ra ameyî nuştene, cayanê merkezîyan de ronayîşê standanê bi waştişê Perwerdeyê Ziwanê Kurdî, akerdişê Parka Gulîstanê Ziwanan, konserê zafziwanî, forum û belgedayîş, bi hemkarîya sazgehanê ziwan û kulturî awankerdişê konserê zafziwanî, semînerê hişmendîya ziwanî yê seba keyeyan, stand-up, bi pêşengîya Meclîsê Kirmanckî seba vernîgirewtişê helîyayîşê kirmanckî Sazgeha Kultur, Ziwan û Zanistî (UNESCO) û Wezîrê Perwerdeyî rê erşawitişê mektûban, kar, xebat û têkoşînê xo yê ziwanê dayîke dewam bikerê.
Ma newe ra bale ancenê û îfade kenê ke, heta ke ziwanê kurdkî qanûnê bingeyinî de bêro qebulkerdene, bi qanûnan bêro garantîkerdene, bibo ziwano fermî û verdibistane ra heta unîversîte bibo ziwanê perwerdeyî, ma do têkoşînê xo yê pawitiş, averdiş û garantîkerdişê kultur, ziwan û nasnameyê kurdî ke erjê bingeyinî yê netewa şarê kurdî yê, bi qerarîdarî dewam bikerê û hêzdarêr bikerê.
#Statuyê Kurdkî — Perwerdeyo Bi Kurdkî
Ziwanê Ma Rûmetê Ma Yo!
Ziwanê Ma Estbîyayîşê Ma Yo!
Ziwanê Ma Nasnameyê Ma Yo!
Bê Ziwan Cuyayîş Nêbeno!
Nîka ra, 21’ê sibate Roja Ziwanê Dayîke ya Dinya, şarê ma yê zerrîwazê ziwanê kurdî û heme şaranê bindestanê dinya yê ke heqê Perwerdeyê bi Ziwanê Dayîke ra bêpar ê, pîroz bo.
SAZGEHÊ ZIWANÊ KURDÎ..
Şîrove Bike
- 6 ay önce
Şîrove