101 sal ser re derbas bû: Divê cihê definkirina Şêx Seîd bê eşkerekirin
Komeleya Şêx Seîd ya li Amedê, di 101emîn salvegera darvekirina Şêx Seîd û 46 hevalên wî de daxuyaniyek çapemeniyê da.
AMÎDA KURDÎ - Di daxuyaniya çapemeniyê ya Komeleya Şêx Seîd ya li navçeya Bajarê Nû ya Amedê de, daxwaza destnîşankirina cihên definkirina Şêx Seîd û hevalên wî hat kirin.
Daxuyaniya çapemeniyê ya Komeleya Şêx Seîd wiha ye:
''13’ê Sibata 2026’an
Tam 101 sal berê, di 13’ê Sibata 1925’an de li Pîronê bûyerek qewimî û di encamê de Şêx Seîd û hevalên wî hatin girtin. Piştî pêvajoya darizandinê, di 29’ê Hezîrana 1925’an de hatin darvekirin.Bûyerên sala 1925’an, di dîroka Komara Tirkiyeyê de yek ji xalên herî girîng ên şikestinê tên qebûlkirin. Ev pêvajo; di çarçoveya têkiliyên dewlet-civakê, polîtîkayên navendîbûnê, nîqaşên nasnameya etnîkî û sepanên hiqûqî de, di dîroknivîsiyê de bi perspektîfên cuda hatiye nirxandin. Lêkolînên akademîk ên li ser sedem, geşedan û encamên van bûyeran, avahiya siyasî û civakî ya pir-tebeqe ya wê demê bi zelalî radixe ber çavan.
Banga Vekirina Arşîvan û Zelalbûnê
Tevî ku sedsalek di ser re derbas bûye, bûyera 1925’an hîn jî ji aliyê dîrokî, civaknasî û siyasî ve tê nîqaşkirin. Mixabin polîtîkayên îmha, înkar û asîmîlasyonê di roja me ya îro de jî berdewam dikin. Ji bo ku ev pêvajo bi awayekî saxlem û giştî bê nirxandin:• Belge û tûtanaqên îfadeyan ên arşîvê,• Tomarên dadweriyê,• Bi taybetî arşîvên TBMM’ê û hemû belgeyên fermî yên têkildar;Divê ji bo dîroknas, hiqûqnas û lêkolîneran bi kapasîteya tam bên vekirin. Ev gava ku dê di çarçoveya prensîbên zelalbûn û gihîştina zanistî de bê avêtin, dê bibe xizmeta derketina rastiya dîrokî û kurbûna xebatên akademîk.
Aştiya Civakî û Hevrûbûn
Hevrûbûna Tirkiyeyê bi dîroka xwe re û nirxandina bûyerên borî bi perspektîfeke piralî, hewcehiya bingehîn a gihîştina demokratîk û aştiya civakî ye. Bi armanca xurtkirina hafizeya civakî û pêşxistina têgihiştina hevdu, em di wê baweriyê de ne ku pêvajoyên "helalkirin" û "hevrûbûnê" berpirsiyariyeke dîrokî ne.
Daxwazeke Mirovî: Tespîtkirina Cihê Goran
Her wiha, em daxwaza xwe ya ji bo tespîtkirin û parvekirina cihê gorên Şêx Seîd û hevalên wî bi raya giştî re nû dikin. Bicihanîna vê daxwazê, hem hewcedariya nirxên mirovî û wijdanî ye, hem jî di rêya avakirina aştiya civakî û pêşerojeke hevpar de gaveke pir bi qîmet e.Nirxandina demboriyê bi nêzîkatiyeke objektîf, piralî û akademîk; ji bo pêşketina hişmendiya dîrokî, diyaloga civakî û kokdayîna çanda demokratîk xwedî girîngiyeke jiyanî ye. Têkoşîna me ya maf, hiqûq û edaletê dê berdewam bike.''
Şîrove Bike
- 6 ay önce
Şîrove